Erfahrungsbericht: Alt und Doof ?

vum Katharina Petzoldt

Dieses Bild hat ein leeres Alt-Attribut. Der Dateiname ist Katharina-sitzend.jpg

Et hät mer nix ussjemaat wie ich dressich jewoode ben, denn mänche Wiever räjen sich allt üvver die Zahl dressich op. Et hät mer nix ussjemaat wie ich dann veezich, fuffzich, sechsich un no jo och sibbenzich jewoode ben. Ävver die Zahl aachzich, die määt mer doch ze schaffe. Mer jeit et noch jot, mer deit nix wieh, ich kann noch allerhands maache un freue mich üvver jeden Daach. Wat ich ävver doch fassjestallt hann, ess, dat mer met jedem Johr winnijer jesinn weed. Mer ess jar nit mih do. Dat kratz mich eijentlich och winnich, ävver wat ich zom verrecke nit ligge kann, ess, dat mer och för blöd verkauf weed noh dem Motto A.D. = alt un doof.

Mer muss immer mih oppasse, dat mer nit bedr….weed. Do ess mer doch et Letz widder su e Dinge passeet: Ich wollt mer en neu Schluffekinema kaufe.

Fründe hann mer ne Lade vörjeschlage, wo mer jot bedeent weed., dich beim Kauf bestens berode, dat Jerät opstelle, un der och  noch verklöre wie dat Dinge ze bedeene ess.  

Dieses Bild hat ein leeres Alt-Attribut. Der Dateiname ist grafik.png

Dä ahle Apparat däten se dann och noch metnemme. Prima!! Su hann ich do aanjerofe. Ne fründlije Minsch wor am Apparat un och tireck e paar Stündche späder bei mer zohuss. Dat neue Jerät sollt en minge ahle Schrank erenpasse. Kei Problem! Flöck hatt dä ne Apparat jefunge, dä Beste, dä et jrad jöv un dä dät och noch jenau en dat Loch em Schrank passen. Dä sollt och nor € 699,– koste, dat wör e Schnäppche un et Enbaue dät dann och nor  € 55,– koste.

No jo, hann ich jedaach, nit jrad bellich, ävver för Qualität muss mer bezahle un mer käuf sich jo nit alle Nas langs en neu Äujelskess. Ich hann dann nor dä fründlije Mann jefrohch, wat dat dann för ne Apparat ess. Dä säht mer de Marke un och de jenaue Bezeichenung.

Jot dat ich dä Här Google kenne. Mich kann esu flöck keine lieme. Vun wäjen alt un doof. Ävver ärjere deit mich dat doch, dat mer immer mih oppasse muss, nit jeliemp ze wäde.

No hann ich jo ne Computer un kann immer der Här Google froge. Un wat wor: derselve Apparat dä he € 699,– koste sollt, koss en Wirklichkeit nor € 335,–.  Wie ich dann bei dem Lade aanjerofe hann, kunnt dat Madämmche am Tilefon nix mih sage.  Et wor seche platt, dat mer su en Ahl wie ich doch nit esu flöck lieme kann. Zuckesöß dät et meer dann rode, mer woanders e neu Ferseher ze kaufe un dat hann ich dann och jedonn.  Ich hann mer dann en nem seriöse Lade en der Stadt för dat selve Jeld eine jekauf, dä akkurat för dä Pries em Internet aanjebodde weed.